Mirza Ghalib

Dayam para hua tere dar par nahin hun main
.
Khak aisi zindagi pe ke pathar nahin hun main
.
Kyun gardish-e-mudam se ghabara na jaye dil
.
Insaan hun pyala-o-saaGar nahin hun main
.
Ya'rab! zamana mujh ko mitata hai kis liye
.
Lauh-e-jahan pe harf-e-mukarar nahin hun main
.
Had chahiye saza men uqubat ke waaste
.
AKhir gunahagar hun kaafir nahin hun main
.
Kis waste aziz nahin janate mujhe
.
Laal-o-zumarud-o-zar-o-gauhar nahin hun main
.
Rakhate ho tum qadam meri aankhon se kyun dareg
.
Rutabe men mahr-o-maah se kamatar nahin hun main
.
Karate ho mujh ko mana-e-qadam'bos kis liye
.
Kya asman ke bhi barabar nahin hun main
.
'Ghalib' wazifa'Khwaar ho do shaah ko dua
.
Wo din gaye ki kahate the naukar nahin hun main